Category: Sen clasificar

Micros abertos de abril

Chega o último xoves do mes e con el chegan tamén os micros abertos de Trabalingua no Café de Catro a Catro.

Achégate ata o Catro e comparte con nós as túas inquedanzas, o que fas, as túas reflexións, a túa arte. Fagas o que fagas, poesía, relato curto, teatro, danza, música, rap, maxia, ensaio… e fágalo no idioma no que o fagas, ti e o que decidas traernos sodes máis que benvidos.

E se prefires ser espectador vente tamén e pasa unha noite dunha maneira diferente.

Outra foliada!

Foliada Trabalingua ESN Café de Mario Vigo

Xa temos as gañadoras do II Quintal Literario!

É xa a segunda edición do concurso (como pasa o tempo) e podemos dicir que, grazas a todos e todas as participantes, volveu ser un éxito. Desta vez recibimos máis de de cincuenta microrrelatos que non llo puxeron nada fácil ó xurado, o que indica que a xente que participa séguelle a poñer ganas e talento. Dende a asociación estámosvos moi agradecidos pola vosa participación, xa que sodes o motivo polo que esta iniciativa segue adiante.

O xurado, composto por unha profesora e un profesor da Universidade de Vigo e dous membros de Trabalingua, reuniuse o mércores 7 de outubro. Hoxe, día 8, temos o pracer de comunicarvos a súa decisión.

O primeiro premio é para “Améndoa amolada, de Marina Fernández Vigo (Ana Crónica).

O primeiro accésit é para “Desamor galáctico, de Noemí Giráldez Pérez (Catchup).

segundo accésit (votación popular) é para Testemuño dun esquecido, de Paula Rodríguez Álvarez (Zverri).

 

A continuación reproducimos de novo os textos:

Améndoa amolada

Améndoa mol coñeceu amorodo moribundo. Ela adoecía dos dentes e iso dificultaba a diversión con outras améndoas, pero a carne morada do amorodo axeitábase as súas necesidades molares (non morais). O drama decidiuse ó amorodo reclamar o seu maior anhelo, pero a améndoa non se deixou anelar. Recolleu a casca que deixara no caixón cando coñeceu ó amorodo e marchou.

Ana Crónica (Marina Fernández Vigo)

Desamor galáctico

Coñecéronse nun evento cósmico. A atracción universal fixo o resto. Ela orbitaba en elipses, coa resignación gravitacional das masas que se atraen. Entón chegou o eclipse. Un saía de noite, o outro de día. Un satélite frío e unha estrela ardendo fitáronse por primeira vez. O sol dáballe calor. Tamén a cegaba. El tiña nictofobia. Atmosferas incompatíbeis. Non puideron ser.

Catchup (Noemí Giráldez Pérez)

Testemuño dun esquecido

O tempo fuxía das presas, afogando co tictac do reloxo.

Namorara da quietude tan pouco presente no cotío. Loitaba nunha gaiola invisíbel, pedía socorro sen resposta. En van.

O tempo era demasiado efímero para que alguén se decatase da súa súplica. “Acougade!”, berraba con mágoa.

Pero era inútil.

Ninguén tiña tempo para o tempo.

Zverri (Paula Rodríguez Álvarez)

Noraboa, rapazas!

Nos próximos meses agardamos ter dispoñibles as postais coas ilustracións dos tres microrrelatos gañadores. Poderanse atopar nas facultades da Universidade de Vigo.

De novo, grazas ós e ás participantes polo voso tempo e creatividade. E tamén, por suposto, a todas aquelas persoas que, se ben non participaron, contribuíron a difundir e promover esta iniciativa. Motísimas grazas a todas e todos.

 

 

Trabalingua busca voluntarios

TRABALINGUA BUSCA VOLUNTARIOS

Quen somos

Unha asociación aberta de mozos e mozas da Universidade de Vigo que pretenden poñer en valor a cultura e lingua galegas. Trabalingua é unha asociación independente, sen dependencia de ideoloxías ou doutras organizacións de calquera índole. Centramos as nosas actividades en defender e promover o uso de galego en tódolos ámbitos e, en especial, na Universidade, por ser a nosa realidade máis inmediata.

Perfís de voluntarios que buscamos

  • Deseñador gráfico: deseño de carteis, folletos e banners para as redes sociais.

  • Community manager: xestión dos nosos perfís nas redes sociais.

  • Deseñador web: para facer máis vistoso o noso blogue, que usa a tecnoloxía WordPress de Blogaliza.

  • Un grupo de persoas para rodar unha curta: sería necesario que tivesen acceso a un equipo de gravación de alta calidade e coñecementos de edición e posprodución de vídeo. (Preferiblemente, pero non necesario, xente de Teleco especialidade de Imaxe e Son ou de Comunicación Audiovisual).

  • Persoa con coñecementos de Marketing e altas doses de creatividade para deseñar e desenvolver unha campaña de comunicación da asociación de cara a conseguir novos socios e ser máis coñecidos na UVigo.

  • Persoas con ganas de organizar actividades que sirvan para promover o uso da lingua galega entre a mocidade, reflexionar sobre a situación da lingua, difundir a cultura galega entre os mozos…

Como pedir información e poñerse en contacto connosco

Mediante o correo asociaciontrabalingua@gmail.com (poñer en copia a voluntariado@uvigo.es)

Por que buscamos voluntarios

Cando comezou a asociación había bastantes persoas que colaboraban activamente pero a medida que os socios antigos deixaban a universidade non fomos quen de conseguir un relevo xeracional. Agora a maioría dos socios remataron os seus estudos ou van rematalos este ano. Se queremos que Trabalingua siga adiante na UVigo precisamos xente nova.

Requisitos

  • Preferiblemente ser estudante da Universidade de Vigo.

  • Compartir os nosos valores e obxectivos.

Que ofrecemos

  • Oportunidade de desenvolver capacidades e habilidades (traballo en equipo, comunicación, organización, xestión de proxectos, relación con outras asociacións e coa prensa, xestión de subvencións…) non presentes nos plans de estudo e que son moi demandadas polas empresas. Esta é a oportunidade para diferenciar o teu currículo do resto dos teus compañeiros de promoción!

  • Oportunidade de facer realidade as túas ideas e proxectos que encadren dentro dos obxectivos da asociación. Ti pos a idea e coordinas a súa realización e nós poñemos máis xente para axudarche, medios materiais e difusión da mesma.

  • Traballo a distancia, na maioría dos casos, e flexible en canto a horarios.

  • Un certificado explicando que actividades realizaches para acreditalo como experiencia para o teu currículum.

  • Créditos ECTS segundo o número de horas traballadas.

  • O pracer de poñer o teu grao de area para que a nosa lingua teña mil primaveras máis!

Máis sobre Trabalingua

Trabalingua foi creada na primavera do 2009 por estudantes de todos os ámbitos (Filoloxía e Tradución, Ciencias Xurídicas, Económicas, Ciencias, Enxeñaría) cando descubrimos que moitos de nós compartiamos a mesma visión sobre a situación actual da lingua. Sabiamos que o futuro do galego está na man da mocidade, pois somos nós quen temos o deber e a responsabilidade de transmitirlles o idioma ás próximas xeracións, ao igual que os nosos pais e avós fixeron con nós.

Tamén, todos nosoutros, querémonos implicar de xeito activo na cultura, realizando actividades novas e participando das que xa hai. De nós depende concienciar á mocidade sobre a situación dramática do idioma para conseguir pequenos cambios a mellor. Como por exemplo, que a mocidade reflexione sobre a situación do galego e a súa actitude cara o idioma; que os galegofalantes se sintan máis orgullosos da súa lingua e non se avergoñen dela; que as persoas que falan galego só en escasas situacións se lancen a usalo con normalidade en toda a súa vida; que as persoas que non falan galego habitualmente si o teñan en estima e que nas nosas actividades atopen un nicho para falar galego sen vergoña…

Revista Trabalingua

Xa logo se cumpren catro meses desde que a Asociación Trabalingua presentámo-la nosa revista. Para aqueles que aínda non tivestes ocasión de botarlle unha ollada ou simplimente queredes volvela repasar, hoxe traémosvola en formato dixital.

Botádelle un ollo tamén ó artigo que se publicara no DUVI

Homenaxe a Fernández del Riego no seu centenario

Dous anos hai daquela homenaxe na que participou Trabalingua e na que se plantou un pradairo para Fernández del Riego. Agora ese pradairo, rexo e forte, levará un placa para lembrar ao insignie galeguista.

“No centenario do seu nacemento e en plena celebración do Ano Francisco Fernández del Riego, a Universidade súmase á conmemoración coa organización dunha homenaxe coa que lembrar a súa figura. Será o vindeiro luns e incluirá o descubrimento dunha placa ao pé do pradairo plantado na súa honra en 2010 nos xardíns do Centro de Apoio Científico e Tecnolóxico á Investigación, CACTI, e a mesa redonda Lembranza e semblanza de D. Paco del Riego.”

“Organizado pola Vicerreitoría de Extensión Universitaria e a Fundación Penzol, o acto de homenaxe contará coa participación de Alfonso Zulueta de Haz, presidente da Fundación, e o vicerreitor Xosé Henrique Costas, aos que máis tarde se unirán para participar na mesa redonda a catedrática de Filoloxía Galega, Camiño Noia; a profesora de Lingua Galega da Universidade de Barcelona, Malores Villanueva; a irmá de Don Paco, Ana Mª Fernández del Riego; e o director da Fundación Penzol, Francisco Domínguez. Ademais, contarase tamén coa colaboración de representantes das asociacións de estudantes Comités e Trabalingua “un bo xeito de que quede representada a cadea xeracional que non racha”, subliña Costas, en referencia á cadea xeracional Zulueta-Costas-alumnado.”
Nova do Duvi

Aquí vos deixamos para o recordo, o vídeo daquela mañá soleada de hai dous anos, no que un pradario foi plantado no CUVI para honra do 1º doutor honoris causa da Universidade de Vigo

Homenaxe Paco del Riego from trabalingua on Vimeo.

Trabalingua no curso novo

Comeza o curso 2011-2012, para uns é unha volta á Universidade e para moitos outros, estudantes de 1 trátase do comezo dunha nova vida, nunha nova cidade, nun novo ambiente.

Se ves para Vigo preocupado pola situación da lingua galega e queres facer actividades para lograr a normalización da nosa lingua en todos os ámbitos da nosa sociedade, Trabalingua é o teu lugar. Aquí atoparás mozas e mozos coma ti, que decidiron compartir parte do seu tempo  libre para organizar e participar en diferentes actividades culturais, deportivas, reivindicativas…

Algunhas das actividades que fixemos nos  últimos anos pódelas ver AQUÍ:

Se queres colaborar con esta asociación ou queres ter máis información envía un correo a  asociaciontrabalingua@gmail.com

Ou busca “Asociación Trabalingua” no tuenti e/ou no facebook.

II Concurso Literario -28- Namoramento

PSEUDÓNIMO: Ceibe

CATEGORÍA: poesía

TÍTULO: Namoramento

Cando fico sen ti,
os recordos fanse soños
e a dúbida da túa existencia
entristece a miña ialma.

II Concurso Literario -26- Quérote

PSEUDÓNIMO: Quen Tiqueiras

CATEGORÍA: Relato

TÍTULO: Quérote

Quero que, ante todo, teñas iso claro. Non quixen deixarte, non vou a esquecerte e nunca te abandonei. Quizais nin sequera saibas quen son, quizais esta carta se perda no tempo antes de chegar a ti.
Quero que saibas que me gustaría moito poder estar aí para ti. Compartir contigo o teu primeiro aniversario, a túa primeira bicicleta, ou o teu primeiro amor.
Pero as estrelas están sempre no ceo. Aínda que a noite non sexa clara e ti non as poidas ver, están aí. Sempre. E eu tamén. Gustaríame que pensases en min como nunha estrela, como o que sempre fun e sempre serei. Túa.
Pode que alguén che falara xa de min, e pode que me odies, pensando que te deixei porque non te quería. Pensar nisto desgárrame por dentro, e a dor é insoportable.
Por iso escribo esta carta, porque non soportaría pensar que non me queres, que me odias por algo que nin sequera ocorreu realmente.
Probablemente te esteas preguntando por que agora, por que non moito antes, aforrando toneladas de dor para ambos.
Simplemente quixen esperar a que puideras entendelo ben. A que puideras comprender que, cando escribín isto, ti aínda non naceras. Pero íalo a facer. Sabía que o ías a facer. Non estaba disposta a permitir que marcharas sen chegar sequera. Sen ver o mundo, sen sentilo, sen tocalo. Aínda que eu non fora a estar aí para acompañarte.

Agora que sabes isto, solo espero que o teu punto de vista cambie, e que non me odies por alimentar a túa vida dando a miña a cambio.

Rosalía 21: concerto no CUVI

Concerto de Abe Rábade, Guadi Galego e Anxo Angueira

Ligazón:
http://extension.uvigo.es/extension_gl/contenido/eventos/musica/Evento_0010.html

Hora: 18.30 horas
Lugar: Teatro Vidal Bolaño

O Teatro Vidal Bolaño acollerá o proxecto Rosalía 21, unha revisión da poetisa galega asina polo escritor e profesor da Facultade de Filoloxía e Tradución, Anxo Angueira, e que conta coa presenza de Abe Rábade, máximo representante do jazz galego, e a voz de Guadi Galego.

WordPress Themes