Revista Trabalingua
11 Marzo 2013Xa logo se cumpren catro meses desde que a Asociación Trabalingua presentámo-la nosa revista. Para aqueles que aínda non tivestes ocasión de botarlle unha ollada ou simplimente queredes volvela repasar, hoxe traémosvola en formato dixital.
Botádelle un ollo tamén ó artigo que se publicara no DUVI
Homenaxe a Francisco Fernández del Riego
6 Marzo 2013O pasado 4 de marzo celebrouse na Universidade de Vigo o centenario do nacemento de Francisco Fernández del Riego, o seu 1.º Doutor Honoris Causa. A Asociación Trabalingua, xunto co presidente da Fundación Penzol, Zulueta de Haz, coa irmá do homenaxeado, Ana M.ª Fernández del Riego, co vicerreitor de Extensión Universitaria, Xosé Henrique Costas e mais cos Comités, participamos nunha homenaxe na que se descubriu unha placa conmemorativa a carón do pradairo que se plantara hai dous anos, cando finou Don Paco.
O presidente da Asociación Trabalingua, Anxo Tato Arias, pronunciou durante o acto estas acertadas e emotivas palabras:
Benqueridas amigas e amigos:
Hai dous anos, un gran home, Don Francisco Fernández Del Riego, deixaba este mundo e un pradairo na súa honra comezaba a botar raíces no CUVI. Raíces que, como hoxe vemos, son tan fondas como a pegada que Don Paco, deixou no noso pobo.
O estudantado da Universidade de Vigo, non quere esquecer a súa persoa e todo que fixo pola nosa nación. Así, as persoas que formamos a asociación Trabalingua, igual que aquel mércores 23 de marzo axudabamos cunha pa a transplantar a este pradairo, aquí estamos outra vez para render homenaxe a este ilustre galeguista, a este bo e xeneroso.
E aínda que non o coñecemos persoalmente, dirémoslle Don Paco. Porque coa semblanza que Malores Villanueva fixo deste home naquela homenaxe, púxolle rostro coñecido e alma a aquel nome e fixo que Del Riego formase parte de todos nós.
Don Paco pertenceu aos intelectuais do grupo Nós, traballou no Seminario de Estudos Galegos e foi membro do Partido Galeguista. Despois da guerra xunto con outros, como Xaime Illa e Ramón Piñeiro, fundou a Editorial Galaxia. El foi tamén o inventor de algo tan noso como o Día Das Letras Galegas, e ocupou o cargo de presidente da Real Academia Galega ata finais de 2001.
Nesta data tan emotiva quixera destacar de Don Paco a súa ilusión, o seu entusiasmo e optimismo, e a súa vontade de conciliación e o seu exemplo galeguizador.
Don Paco é exemplo dese entusiasmo que nunca se debe abandonar. Que grande sería a ilusión deste home da xeración Nós para mantela viva aínda despois da guerra civil!
Don Paco é exemplo de esperanza. Así, cando o golpe fascista do 36 lles segou a vida e soños a tantos amigos seus, non perdeu a esperanza e con optimismo axudou a prender un facho. Naquela longa noite de pedra, uns poucos valentes e visionarios prenderon un facho de luz e lume, que deu en chamarse Galaxia. Alí se xuntaron os vellos galeguistas e, baixo o seu paraugas, conseguiron transmitirlle aos máis novos o vello soño de Galiza. Desta maneira, eles lograron que o galeguismo non esmorecese.
E por último, Don Paco é tamén exemplo de conciliación. De unión entre todos os que levamos a Galicia no corazón, de unión para participar xuntos na construción do noso país.
Para rematar, igual que seguramente diría o noso estimado Francisco, queremos lembrarvos a todos vós o que nos une. Nestes tempos de incerteza, de descomposición social, hai tantas e tan variadas ideoloxías e posturas ante o momento que nos tocou vivir, que a veces semella que non temos nada en común e así é que se ven nalgúns escenarios loitas fratricidas. E iso non é certo. Lembremos que aínda con ideas distintas, ti e máis eu somos galegas e galegos, somos herdeiros dunha longa tradición, dunha cultura con séculos de historia. Só tendo claro eses lazos, o noso pobo poderá afrontar con éxito os avatares deste novo século.
Que quede nos nosos corazóns a memoria de Francisco Fernańdez del Riego, e a de toda esa romaría infinda de homes e mulleres que axudaron a construír este país.
Saúde.
Homenaxe a Fernández del Riego no seu centenario
4 Marzo 2013Dous anos hai daquela homenaxe na que participou Trabalingua e na que se plantou un pradairo para Fernández del Riego. Agora ese pradairo, rexo e forte, levará un praca para lembrar ao insignie galeguista.
«No centenario do seu nacemento e en plena celebración do Ano Francisco Fernández del Riego, a Universidade súmase á conmemoración coa organización dunha homenaxe coa que lembrar a súa figura. Será o vindeiro luns e incluirá o descubrimento dunha placa ao pé do pradairo plantado na súa honra en 2010 nos xardíns do Centro de Apoio Científico e Tecnolóxico á Investigación, CACTI, e a mesa redonda Lembranza e semblanza de D. Paco del Riego.»
«Organizado pola Vicerreitoría de Extensión Universitaria e a Fundación Penzol, o acto de homenaxe contará coa participación de Alfonso Zulueta de Haz, presidente da Fundación, e o vicerreitor Xosé Henrique Costas, aos que máis tarde se unirán para participar na mesa redonda a catedrática de Filoloxía Galega, Camiño Noia; a profesora de Lingua Galega da Universidade de Barcelona, Malores Villanueva; a irmá de Don Paco, Ana Mª Fernández del Riego; e o director da Fundación Penzol, Francisco Domínguez. Ademais, contarase tamén coa colaboración de representantes das asociacións de estudantes Comités e Trabalingua “un bo xeito de que quede representada a cadea xeracional que non racha”, subliña Costas, en referencia á cadea xeracional Zulueta-Costas-alumnado.»
Nova do Duvi
Aquí vos deixamos para o recordo, o vídeo daquela mañá soleada de hai dous anos, no que un pradario foi plantado no CUVI para honra do 1º doutor honoris causa da Universidade de Vigo
Homenaxe Paco del Riego from trabalingua on Vimeo.
Recital de Rosalía
19 Febreiro 2013Este ano cúmprense 150 anos da publicación da obra «Cantares Gallegos» de Rosalía de Castro. Ademais, o domingo día 24 de febreiro celébrase o aniversario do nacemento desta importante escritora da nosa lingua.
Os Comités e Trabalingua coa colaboración da Universidade de Vigo convidámosvos a un recital de Rosalía o próximo 28 de febreiro ás 20:30. Será no bar Cabiria (rúa Afonso XII, 32) (http://goo.gl/maps/9vGpv).
Animádevos a recitar e homenaxear a Rosalía!
Ti informas, Trabalingua denuncia.
23 Novembro 2012Seguro que máis de un de vós xa está canso de ver letreiros que deberían estar en galego e non o están (ou intentan estalo pero ó único que se achegan é ó castrapismo).
En Trabalingua non queremos pasar isto por alto e propoñémonos denuncialo. Como? Pois mediante esta pegatina:
Cada vez que atopemos algún cartaz, letreiro ou documento que non estea en galego, alí irá a nosa pegatina para reclamar «E EN GALEGO?».
Por iso precisámo-la túa colaboración! Cada vez que vexas algo que non debería ser e inda non estea denunciado por nós, avísanos e farémolo de inmediato! Anímate!
Retranca en tempos de crise
27 Marzo 2012Xa se sabe que o mellor xeito de sobreleva-la crise é poñerlle á vida unha miguiña de humor…
Pois velaquí vos presentámo-la vindeira actividade da asociación Trabalingua! En que consiste?
En primeiro lugar, contaremos coa actuación de Candido Pazó, que nos deleitará cun dos seus monólogos. A seguir, dará uns consellos para a seguinte parte da actividade: micrófono aberto-concurso de monólogos en galego. Tódolos que vos animedes, poderedes subir ó escenario e facernos rir co voso enxeño. Así que… ide dándolle ós miolos!
Haberá premio para o gañador, que sairá escollido por votación do público!
Todo isto será o xoves 12 de abril ás 18:30 no salón de actos da escola de Peritos, Torrecedeira.
P.D.: En canto teñades claro que vaiades participar podédesvos ir apuntando mandándono-los vosos datos a asociaciontrabalingua@gmail.com. Escribide e enviade tamén unhas poucas liñas sobre vós mesmos para que vos poidamos presentar con tódolos honores! Agardámosvos!
COMBATE D’A HOSTIA EN VERSO!!
10 Marzo 2012Damas e cabaleiros! Señoras e señores!
A asociación Trabalingua ten o pracer de anunciarlles que o próximo mércores 14 as 16:30 os incomparables poetas d’A Hostia en Verso estarán no bar Universitas da Praza Miralles para pelexarse nun combate sen igual!
Será un combate dialéctico onde as puñadas serán os versos de cada un dos poetas!!
Ante a expectación que estamos espertando en todos vós, deixarémosvos coas ganas e próximamente revelaremos a temática e os poetas que combatirán nel.
Agardamos vervos a todos no Universitas!
Obradoiro de BeatBox
14 Decembro 2011Queres aprender beatbox ou mellora-las túas técnicas da man dun dos mellores do panorama galego?
Pois atrévete e apúntate ó obradoiro de beatbox que organizamos dende Trabalingua con Gendebeat! Será o xoves 26 de xaneiro ás 16:30 na sala 4 do Edificio Miralles.
Aínda non coñeces a Gendebeat? Évos un cantante de reggae-ragga en galego e un dos pioneiros do beatbox en Galicia. Os seus obradoiros consisten nunha sesión de hora e media na que aprenderedes aspectos da historia musical nun percorrido que irá dende a percusión vocal que practicaban as culturas máis tradicionais ata o beatbox dos movementos urbanos máis actuais. Despois, iredes descubrindo os trucos necesarios para imitar distintos instrumentos coa boca así como as técnicas para unha correcta execución dos ritmos.
E para aqueles que aínda están indecisos… vai un empurronciño! Botádelle un ollo a isto!
VEÑA, ATRÉVETE E APÚNTATE! É DE BALDE!
SÓ TES QUE ENVIÁRNO-LOS TEUS DATOS A asociaciontrabalingua@gmail.com
Trasnada 11.1 punto de encontro para tradutores de software libre
11 Novembro 2011A Asociación Proxecto Trasno organiza mañá sábado a Trasnada 11.1.
A trasnada é o evento que reune aos tradutores de software libre ao galego. Celebrado por primeira vez en Ordes e despois outra vez na cidade das Burgas, desta volta a súa terceira edición celebrase na cidade olívica. Alí daremonos cita para fixar terminoloxía e expor ao público o noso traballo.
En que consiste?
A trasnada serve de punto de encontro para tradutores de software libre, aqueles que traballamos baixo o paraugas do Proxecto Trasno. O evento serve de sesión de traballo. Estando enfocados en producir calidade, o tema de debate fundamental será a terminoloxía no ámbito da tradución. Por outra banda, serve de escaparate ao público que queira coñecer o proxecto, a xente que o conforma e como punto de aprendizaxe para todos os interesados en colaborar na localización.
Cando e Onde?
A trasnada 11.1 terá lugar este 12 de Novembro nunha sala cedida por Amigos da Terra, na Cidade de Vigo, rúa Policarpo Sanz, 17, na entreplanta, xusto en fronte do Centro Social de Novacaixagalicia.
+info: http://www.trasno.net/trasnada111
Cafés-teatro científicos
2 Novembro 2011GOZA DA CIENCIA DUNHA FORMA DIFERENTE este venres 4 de Novembro ás 20:30 horas na cafetaría « Tras do Marco» en Vigo.
Que son os cafés-teatro científicos?
Un grupo de docentes da Universidade da Coruña importou hai uns anos a fórmula do café científico de tradición anglosaxoa, e adaptouna á cultura galaica.
Os cafés científicos comezaron a desenvolverse en Galicia na Semana da Ciencia de 2006. Nese ano o persoal investigador do grupo NEUROcom, Casto Rivadulla e Xurxo Mariño, puxeron en funcionamento esta iniciativa co obxectivo de achegarlle o coñecemento científico a todo o mundo, dun xeito atractivo e divertido mais sen perder o rigor.
En palabras do propio Xurxo Mariño: «O noso espírito é de emboscada. En lugar de pedirlle á xente que veña vernos, imos nós a un bar popular e céntrico onde sempre hai xente».
En Vigo estarán Castro Rivadulla Fernández (Profesor da UDC), Pablo Arias Rodríguez (Investigador Grupo de Neurociencia) e César Goldi (actor) falando sobre o cerebro. Agardámoste!
Os Cafés-teatro científicos tamén se realizarán en:
-Ourense – Xoves 17 de novembro – Cafetaría Auriense – 21.00 h
-Pontevedra – Xoves 10 de novembro – Pousada Indiana – 21.00 h
Organizan:
-Servizo de Normalización Lingüística do Concello de Vigo
-Área de Normalización Lingüística da Universidade de Vigo
-Asociación Trabalingua
top